service dot com

उच्च रक्तचापपाखें बचे जुइगु उपाय

लहना वाःपौ 

उच्च रक्तचाप व तनाव लिपांगु इलय् सकल मनूया मंकाः स्वास्थ्य समस्या जुया वनाच्वंगु दु। नयली सन्तुलन मदुगु, ब्यस्त व उखेंथुखें जुइमाःगु जीवनशैली व ब्यायामया अभाव नापनापं अप्वः चि नय्गु व फाष्टफुड अप्वः छ्यलाबुलाया हुनिं मनूत उच्च रक्तचापया समस्या जुयाच्वंगु दु।

रक्तचाप सामान्य अवस्था स्वयां अप्वः अर्थात १४० व ९० स्वयां मदिक्क थाहां वनाच्वन धाःसा उकियात उच्च रक्तचाप धकाः धाइ। अथेखःसां उच्च रक्तचाप थःहे ल्वय् धाःसा मखु तर थुकिं मेमेगु ल्वय् अप्वय्केत ग्वाहालि याइगु खः। थुकिं बुलुहुं शरीरया मेमेगु अंगयात गथेकि नुगःचु, मिखा, जलास्येँयात स्यंका बी। यदि मनूतय्सं जीवनशैली व नय् त्वनेगु खँय् सन्तुलन याय्फत धाःसा नं उच्च रक्तचापपाखें बचे जुइफइ।
उच्च रक्तचापपाखें बचे जुइत थीथी खँय् ध्यान बीमाः।

१. जगिङ :

 नियमित कथं ब्वाँय् वनेगु वा न्यासि वनेगु उसाँय्या नितिं फाइदा जुइगु थीथी अध्ययनं क्यंगु दु। अनुसन्धानकर्तातय् कथं वालय् छघौ जक जगिङ याःसां नं खुदँ अप्वः म्वाइ । जगिङं बहुआयामिक स्वास्थ्य लाभ याइगु शोधकर्तातय्गु दावी दु। थुकिं हिपाखें अक्सिजन काय्गु दर अप्वय्कीगु नापं रक्तचापयात सन्तुलन याय्त ग्वाहालि याइ। जगिङ जुइमा वा मेमेगु छुं नं शारीरिक ब्यायाम, उकिं नुगःचुयात सक्रिय व सशक्त दय्केगु नापं हि पम्प याय्गु प्रक्रियायात अःपुकीगु जूगुलिं हिनुली लाइगु दबाबयात म्हो याय्त ग्वाहालि याइ। थुकिया हुनिं रक्तचाप सन्तुलनय् वइगु खः।

२. मही त्वनेगु ः

 उच्च रक्तचापया ल्वगियात मही त्वनेगु तसकं फाइदा याइगु खःसा स्वस्थ मनुखं नियमित कथं मही त्वन धाःसा थुकिं रक्तचाप नियन्त्रणय् तय्ग ग्वाहालि याइ। अध्ययनकथं न्हि छगू कप मही त्वन धाःसा उच्च रक्तचापया जोखिम स्वंगूया छगू ब्व म्हो जुइ। महीइ दइगु क्याल्सियमं हिनूयात बल्लाकेगु नापं यातुकेत ग्वाहालि याइगु जूगुलिं हिनू अःपुक न्यनावनीगु हुनिं दबाब म्हो जुयाः रक्तचाम नियन्त्रणय् तय्त ग्वाहालि जुइ।

३. केरा नयगु :  

केराय् प्रशस्त मात्राय् पोटासियमया लवण दइ। केरा थेंजाःगु पोटासियम दुगु सि नय्गु नापं चि म्हो जक नय्गु यात धाःसा रक्तचाप अप्वइगु जोखिमयात म्हो याय्फइ। पोटासियमं शरीरय तरल पदार्थया सन्तुलन यानातइ। गुकिंयाना रक्तचाप नियन्त्रण जुयाच्वनी । विज्ञतय्सं रक्तचापयात सन्तुलनय् तय्त न्हिं न्यापु तक केरा नय्त सुझा बीगु याः।

४. चि म्हो जक नय्गु ः

 चि अप्वः नल धाःसा अथेहें रक्तचाप अप्वया वनी। हिइ चि दुहांवनेवं हिनुली हिया मात्रा व चाप अप्वय्का बी। चि अप्वः दुगु तरकारी मनय्गु जक मखु, चि अप्वः दुगु थीथी कथंया फाष्टफुड नय्गु नं म्हो याय्माः।

५. शरीरया तौल नियन्त्रण याय्गु ः

 मनूत यक्व ल्ह्वन धाःसा नं थीथी कथंया हृदयरोगया जोखिम अप्वय्की । शोधकर्तातय् कथं छुं छुं तौल जक उच्चरक्तचाप म्हो याय्त ग्वाहालि याइ।

६. धुम्रपान मयाय्गु ः

धुम्रपान उच्च रक्तचापया मू कारण खः। चुरोटय् दुगु निकोटिनं शरीरया ग्रन्थीयात उत्प्रेरित याइ, गुकिया हुनिं एड्रिनलिन हर्मोन उत्पादन याइ। थुगु हर्मोनया हुनिं नुगःचुया धड्कन अप्वय्की व हिनुली दबाब अप्वय्काः रक्तचाप अप्वया वनी।

७. ज्या म्हो याय्गु :

यक्व ब्यस्त जीवनशैली नापं ज्याया धपेडी उच्च रक्तचापया छगू मू कारण जूगु दु। छगू अध्ययनया कथं निरन्तर वालय् ४० घौ ज्या यात धाःसा रक्तचाप १४ गू प्रतिशत अप्वइ। ओभरटाइम याय्गु बानिं रक्तचाप अझ अप्वइगु अध्ययनं निष्कर्ष पिकाःगु दु। वालय् ४० घौ ज्या याइपिं स्वयां ५१ घौ ज्या याइपिनिगु उच्च रक्तचापया जोखिम २९ गू प्रतिशत अप्वः खनेदुगु खः।

८. ह्यःसः वइगु ः

 सु नं मनूत द्यनीबले अप्वः न्ह्यःसः वइगु बानी दुसा उमित उच्च रक्तचापया समस्या जुइफु। अथे बानी दुसा थःगु रक्तचापया परीक्षण यानाः सावधानीया उपाय नालेमाः।

९. कफि म्हो जक त्वनेगु ः

 थौकन्हय् झी अप्वः कफि त्वनेगु बानी जुया वनाच्वंगु दु। थथे अप्वः कफि नापं थजाःगु पदार्थ त्वनीपिन्त रक्तचाप अप्वइ। न्हियान्हिथं स्वंगू कप ताःई तक त्वन धाःसा रक्तचाप स्वंगू प्वाइन्टं अप्वइगु शोघकर्तापिनिगु धापू दु। कफी दइगु क्याफाइन तत्वं हिनू छाइगु व उकिं रक्तचाप अप्वय्कीगु खः।

१०. गाजरया जुस:

 नियमित कथं गाजर, सलगम व लौकाया जुस त्वन धाःसा रक्तचाप सन्तुलन याय्गु नितिं तसकं ग्वाहालि याइ।