हनुमान ढोका क्षेत्रको सम्पदा पुनःनिर्माणय् स्थानीय जनताया सरोकार

सन्ध्या टाइम्स संचार सहकारी संस्था लि.या ग्वसालय् थगुने बैशाख १२ गते तःभुखाचं क्षति जूगु येँ हनुमानध्वाखा लाय्कू लागाया सम्पदा पुनःर्निर्माण विषययात कयाः थौं छगू अन्तक्र्रियात्मक ज्याझ्वः याःगु दु ।
येँ महानगरपालिका हनुमानध्वाखा लाय्कू संरक्षण ज्याकूया न्हूम्ह कार्यक्रम प्रमुख भाजु उदय पसखलः (श्रेष्ठ)या प्रमुख आतिथ्यताय् उगु ज्याझ्वलय् नवासें वय्कलं थः प्रमुख जुयाः वये धुंकाः मेपिनिगु तुलनाय् छपलाः न्ह्याः वनेगु जुइ धयादिल ।
ज्याकूया न्हूम्ह कार्यक्रम प्रमुख जुयाः झायादीम्ह वय्कःया ख्यें सगं बियाः खादां क्वखायेकाः लसकुस यायेगु ज्या जूगु खः । संस्थाया नायः रमेशकाजी स्थापितया सभापतित्वय् जूगु ज्याझ्वलय् वय्कलं स्वांम्हू लःल्हानाः लसकुस यानादीगु खःसा नेवाः स्वायत्त राज्य मंकाः संघर्ष समिति सचिवालय कजि मल्ल के. सुुन्दरं खादां क्वखायेकादीगु खः ।
ज्याझ्वलय् ज्याकू प्रमुख पसखलं हनुमानध्वाखा बसन्तपू लाय्कू लागाया सम्पदा क्षेत्र पुनःर्निर्माणया निंतिं गुलि चिउताः नेवाःतय्सं कयाच्वंगु खः, उलि हे येँ महानगरपालिका व थः प्रमुख जुयावयाच्वनागु ज्याकूयात नं चिउताः दु धयादिल । वय्कलं थः निमित्त नायक जक जुयाच्वंगु धासें मरुसतः पुनःर्निर्माणया निंतिं पुरातत्व विभागं माःकथंया सकतां आवश्यक ग्वाहालि बीगु बचं बिउगु जानकारी बियादिल ।
थःत बिउगु सम्मानया कदर यासें थम्हं नं उकिया मू पुलेकथं सम्पदा क्षेत्रया पुनःर्निर्माणया निंतिं छुं नं छुं ज्या न्ह्याकेगु जुइ धयादिल ।
ज्याझ्वलय् मल्ल के. सुन्दरं झी पूर्खापिंसं धस्वाका थकूगु नेपालमण्डलया सम्पदात आः हाकनं गुकथं धस्वाकेगु धइगु खँय् चिउताः प्वंकेमाः धयादिल । सम्पदा पुनःर्निर्माणय् महानगरपालिकाया जक चिउताः मजूसे थ्व राष्ट्रिय व अन्तर्राष्ट्रिय चिउताःया विषय जूगु खँ वय्कलं कनादिल ।
भुखाचं क्षति जूगु मरुसतः, माजु देगः, दश अवतार देगः जकमखसे पुनःर्निर्माण यायेबलय् उगु लागा व उकिया जःखः च्वंगु जीवन्त अभौतिक सम्पदात नं सरंक्षण यायेगु खँय् ध्यान बीमाः धयादिल ।